Spielbericht MIP II – Friedberg I
Liebe Freunde des Schachsports!
Es Wischtischste zuerst: Mer (MiP II) hawwe knapp gewonne (4.5:3.5) un die Klass gehalde!!! Mer sinn nur 15 Minude späder als verabred bei die AWO losgebrettert un nur 10 Minude zu spät in Fridbersch akomme (also für unser Verhältnis super pünktlisch).
Am erste Brett hat de Makkus eschpielt, der wo misch gebede hat, widder son Berischt zu schreiwe, weil er ach ema erwähnt wern wollt. Dem Makkus sei Fra odder Freundin dud in London wohne, wesdewesche er normalerweis net spiele kann. Gestern war se awwer in de USA und so hatter gekonnt (isch waas, des is net logisch, awwer so isses mer erklärt worn). De Makkus hat awwer drotzdem net schpiele könne, alldieweil sein Geschner net komme is.
Am zwaade Brett hat de Jörsch gesesse un ganz untypisch för ihn ganz schnell un ohne jede Zeitnot sein Geschner verhaue und ferdisch. Am dridde Brett war de Geralf. Der hat mer im Audo noch erzählt, dass er uff jeden Fall so e langweilisch Stellungsgeschiebe vermeide will und voll Risiko gehe wollt. Als isch mit meiner Battie ferdisch bin, sinn bei seiner alle Leischtfigurn weg un sonst noch alles da (also bei jedem 8 Bauern, zwa Türm un die Tande). Er hat des Geschiebe dann als Letzter verlorn.
De Herbert am vierde Brett hat mit seim Könisch nach zeh Züch so nackisch dagestande, dass es mir peinlisch war. Isch hätt kein Pfifferling mer uff en gebbe. Frach mich wie, awwer er hats gewonne. Grad umgekehrt wars beim Bernd. Als isch hieguck, steht der bombisch: A Figur un zwei Bauern mehr. Glasklar Gewinnschtellung. Isch waas net wie, awwer er hats verdaddelt und verliert.
De Erik am Fünfte hat sein Gescheüwwer in 19 Züsch vermöbelt. Die arm Sau is dann von seim Mannschaftsführer, gesche den wo isch geschpielt hab, fürschterlisch beschimpft worn, weil er uffgegewe hat, anstatt sischs so rischtisch zeische zu lasse.
Isch selwer hab am sibde Brett remis gespielt. – Zuerst hab isch mei Battie mit dem Jörsch analysiert un gelernt, dass isch hätt gewinne müsse. Dann musst isch des Ganze nochema in de Kneip vorführn un hab vom Karsten gelernt, dass isch mein Torm net hätt dausche solle, awwer dass es vermutlich ach so Remis ausgange wär. Isch selber habs net so ganz verstanne, wer von dene zwei nu Rescht hat, awwer wurscht.
Uffs achte Brett, wo de Walder gespielt habbe dud, hab isch net so rischtisch uffgepasst. Am Anfang war de Walder net da un am End hat er verlorn.